کیا ملے گا تجھے بکھرے ہوئے خوابوں کے سوا
ریت پر چاند کی تصویر بنانے والے

سب نے پہنا تھا بڑے شوق سے کاغذ کا لباس
اس قدر لوگ تھے بارش میں نہانے والے

مر گئے ہم تو یہ کتبے پر لکھا جائے گا
سو گئے آپ زمانے کو جگانے والے

در و دیوار پر حسرت سی برستی ہے محسن!
جانے کس دیس گئے پیار نبھانے والے

تم مرے ساتھ ہو یہ سچ تو نہیں ہے لیکن
میں اگر جھوٹ نہ بولوں تو اکیلا ہو جاؤں

میں تری قید کو تسلیم تو کرتا ہوں مگر
یہ مرے بس میں نہیں ہے کہ پرندہ ہو جاؤں

آدمی بن کے بھٹکنے میں ۔۔۔۔۔۔۔۔مزا آتا ہے
میں نے سوچا ہی نہیں تھا کہ فرشتہ ہو جاؤں

وہ تو اندر کی اداسی نے بچایا۔۔۔۔۔۔۔ورنہ
ان کی مرضی تو یہی تھی کہ شگفتہ ہو جاؤں

احمد کمال پروازی

سُنا ہے آدمی مر سکتا ہے بچھڑتے ہوئے 
ہمارا ہاتھ چھوؤ ، سرد ہے ؟ نہیں ہے نا ؟

سُنا ہے ہجر میں چہروں پہ دھول اڑتی ہے 
ہمارے رخ پہ کہیں گرد ہے ؟ نہیں ہے نا ؟

کوئی دلوں کے معالج ، کوئی محمد بخش
تمام شہر میں کوئی مرد ہے ؟ نہیں ہے نا ؟

وہی ہے درد کا درماں بھی افتخار مغل
کہیں قریب وہ بے درد ہے ؟ نہیں ہے نا ؟

ڈاکٹر افتخار مغل (مرحوم)

’’ ہجو ‘‘

خاک در خاک تری ہجرت و ایثار پہ خاک
خاک در خاک ترے سب درو دیوار پہ خاک

بستیاں خوں میں نہاتی ہیں چمن جلتے ہیں
خاک در خاک تری گرمی ء گفتار پہ خاک

اس سے بہتر تھا کہ اقرار ہی کرلیتا تو !
خاک در خاک تری جراءت ِ انکار پہ خاک

شام تک دھول اڑاتے ہیں سحر تک خاموش
خاک در خاک ترے کوچہ و بازار پہ خاک

خون آلود مصلّے ، صفیں لاشوں سے اٹی
خاک در خاک ترے جبّہ و دستار پہ خاک

آئنے عکس میسر نہیں تجھ کو بھی تو پھر
خاک در خاک ترے جوہرِ زنگار پہ خاک

لحنِ دل تو بھی اسی شور میں شاداں ہے تو پھر
خاک در خاک ترے نغمہ و مزمار پہ خاک

کنجِ محرومی سے نکلو کسی جنگل کی طرف
خاک در خاک پڑے شہرِ ستمگار پہ خاک

خاک در خاک ترے لہجہ و تکرار پہ خاک

پڑی مجھ پہ اوچھی وہ تلوار چل کر
گئی کس طرف موت کمبخت ٹل کر

نہ وحدت سے طلب نہ کثرت سے مطلب
نہ گھٹ کر ہوں قطرہ نہ دریا ابل کر

تری بات بھی تیر ہے ناوک افگن
گڑی میرے دل میں زیاں سے نکل کر

جو شام شبِ ہجر دیکھی تو سمجھے
قضا سر پہ آئی ہے صورت بدل کر

جہاں میں نہ کی قدر غم جب کسی نے
پشیماں ہوا میرے دل سے نکل کر

رخ اس بت کا شاید نکلتا ہے پتھر
کہ قدموں پہ گرتی ہیں نظریں پھسل کر

جلا تھا مرا دل جو پروانہ آسا
کہا میں نے بھی شمع رو ان کو جل کر

جلانے کو دل داغ سینہ ہے حاضر
مگر تو ہی اے داغ پہلے پہل کر

جو کھینچے گا بھی تیر سینے سے ظالم
تو پیکاں سے لے جائے گا دل بدل کر

انہیں آتے دیکھا تو دوڑیں نگاہیں
گئیں آنکھیں ان سے بھی آگے نکل کر

یہ میری طرف پاوٓں محفل میں کیسے
ذرا آدمیت سے بیٹھو سنبھل کر

عزیز اس قدر نقد جاں کیوں ہے اے دل
خدا دے جو ہمت تو نذر اجل کر

وہ بسمل ہوں جو ہاتھ قاتل نے کھینچا
گلے پر مرے گر پڑی تیغ اُگل کر

میرا دل بھی آئینہٓ انجمن ہے
دکھاتا ہے سو رنگ صورت بدل کر

قدم جب خوشی نے در دل پہ رکھا
صدا غم نے دی دیکھ ظالم سنبھل کر

امیؔر اہل مسجد سے اظہار تقویٰ
ابھی آئے ہو میکدے سے نکل کر

رفتگاں کے بکھرے سایوں کی
ایک محفل سی دل میں سجتی ہے
فون کی ڈائری کے صفحوں سے
کتنے نمبر پکارتے ہیں مجھے
جن سے مربوط بے نوا گھنٹی
اب فقط میرے دل میں بجتی ہے

کس قدر پیارے پیارے ناموں پر
رینگتی بدنُما لکیریں سی
میری آنکھوں میں پھیل جاتی ہیں
دوریاں دائرے بناتی ہیں

نام جو کٹ گئے ہیں اُن کے حرف
ایسے کاغذ پہ پھیل جاتے ہیں
حادثے کے مقام پر جیسے
خون کے سوکھے نشانوں پر
چاک سے لائینیں لگاتے ہیں

! پھر دسمبر کے آخری دن ہیں

ہر برس کی طرح سے اب کے بھی
ڈائری ایک سوال کرتی ہے
کیا خبر اس برس کے آخر تک
میرے ان بے چراغ صفحوں سے
کتنے ہی نام کٹ گئے ہونگے

کتنے نمبر بکھر کے رستوں میں
گردِ ماضی سے اٹ گئے ہونگے
خاک کی ڈھیریوں کے دامن میں
کتنے طوفان سِمٹ گئے ہونگے

ہر دسمبر میں سوچتا ہوں میں
اک دن اس طرح بھی ہونا ہے
رنگ کو روشنی میں کھونا ہے
اپنے اپنے گھروں میں رکھی ہوئی
ڈائری دوست دیکھتے ہونگے
اُن کی آنکھوں کے خواب دانوں میں
ایک صحرا سا پھیلتا ہوگا

اور کچھ بے نِشاں صفحوں سے
!.... نام میرا بھی کٹ گیا ہوگا

?

 ہلچل مچائے سینے میں ترے لبوں کا تھر تھرانہ
 ہلیں لب ترے جیسے کنول لہروں میں کرے رقص

 اپنا تو وطیرہ ہے یہی غم میں بھی مُسکراؤ
 زیرپا جیسے رقاصہ کوئی زنجیروُںمیں کرے رقص

 تیرے بولنے سے ہلچل ہوئی فضا میں چار سوُ
 ساری دُنیا تری شہد بھری باتوں میں کرے رقص

 بس گئی تصویر تری ان آنکھوں میں اس طرح
 تیرا سایہ مرے کمرے کی دیواروں میں کرے رقص

 آئے تو میرے رُو برُو تو لگے ہے اس طرح
 جیسے درد بھی مرے دل کے زخموُں میں کرے رقص

 جھومے تیرے خیال کی رعنائیوں سے دل
 پھولوں بھری ٹہنی جیسے بہاروں میں کرے رقص

 بات وہ آدھی رات کی ، رات وہ پورے چاند کی
 چاند بھی عین چیت کا اس پہ ترا جمال بھی

 سب سے نظر بچا کہ وہ مجھ کو ایسے دیکھتا
 ایک دفعہ تو رک گئی گردش ماہ و سال بھی

 دل کو چمک سکے گا کیا ، پھر بھی ترش کے دیکھ لیں
 شیشہ گران شہر کے ہاتھ کا یہ کمال بھی

 اس کو نہ پا سکے تھے جب دل کا عجیب حال تھا
 اب جو پلٹ کے دیکھئیے ، بات تھی کچہ محال بھی

 مری طلب تھا ایک شخص وہ جو نہیں ملا تو پھر
 ہاتھ دعا سے یوں گرا ، بھول گیا سوال بھی

 اس کی سخن طرازیاں مرے لئے بھی ڈھال تھیں
 اس کی ہنسی میں چھپ گیا اپنے غموں کا حال بھی

 گاہ قریب شاہ رگ ، گاہ امید دائم و خواب
 اس کی رفاقتوں میں رات ، ہجر بھی تھا وصال بھی

 اس کے بازوؤں میں اور اس کو ہی سوچتے رہے
 جسم کی خواہش پہ تھے روح کے اور جال بھی

 شام کی نا سمجھ ہوا پوچھ رہی ہے اک پتا
 موج ہوائے کوئے یار ، کچھ تو مرا خیال بھی

جو دھوپ اوڑھے ہوئے بھی سایہ تو دے رہی ہے
 وہ شاخ کتنی ہی بے ثمر ہے ، حسین تر ہے

 جو سر پہ دستِ کرم ہے ان کا تو رنج کیسا
 پھر عمر جتنی بھی مختصر ہے ، حسین تر ہے

وہ شہر ان کا کمال سے بھی کمال ہے پر
 وہ ان کے در کی جو رہگزر ہے ، حسین تر ہے

فشارِ جاں بھی قرارِ جاں ہی لگے ہے اب تو
 جو مجھ پہ طاری ترا اثر ہے ، حسین تر ہے

جو حق پہ بولے، زبان کھولے، سکوت توڑے
 مرے لیے تو وہ معتبر ہے ، حسین تر ہے

یہاں وہاں ہے ، اِدھر اُدھر ہے ، کدھر کدھر ہے
 ترا تصّور جدھر جدھر ہے ، حسین تر ہے