تھا میر جن کو شعر کا آزار مر گئے

[Zarnish Ali]

تھا میر جن کو شعر کا آزار مر گئے
غالب تمہارے سارے طرفدار مر گئے
جذبوں کی وہ صداقتیں مرحوم ہو گئیں
احساس کے نئے نئے اظہار مر گئے
تشبیہہ وا ستعار ہ ور مزو کنایہ کیا
پیکر تراش شعر کے فنکار مر گئے
ساقی تری شراب بڑا کام کر گئی
کچھ راستے میں، کچھ پسِ دیوار مر گئے
تقدیسِ دل کی عصیاں نگاری کہاں گئی
شَاید غزل کے سَارے گناہ گار مر گئے
شعروں میں اب جہاد ہے، روزہ نماز ہے
اُردو غزل میں جتنے تھے کفّار مر گئے
اخبار ہو رہی ہے غزل کی زبان اب
اپنے شہید آٹھ ،اُدھر چار مر گئے
مصرعوں کو ہم نے نعرہ تکبیر کر دیا
گیتوں کے پختہ کار گلوکار مر گئے
اسلوب تحت اتنا گرجدار ہو گیا
مہدی حسن کے حاشیہ بردار مر گئے
تنقیدی اصطلاحوں کے مشتاق شہ سوار
گھوڑوں پہ دوڑے آئے تھے سردار مر گئے
ناز و ادا سے مچھلیاں اب ہیں غزل سرا
تہمد پکڑ کے صاحبِ دستار مر گئے
یا رب طلسمِ ہو ش رہا ہے مُشَاعرہ
جن کو نہیں بُلایا، وہ غم خوار مر گئے
بشیر بدر

[waqas dar]

جب حرف ناشناس يهان لفظِ فهم هين
كيون ذوق شعرديكي تماشه كيا مُجهـي

[Hareem Naz]

Smj kuj bi nh i 

[Zarnish Ali]

سوچا نہیں اچھا برا دیکھا سنا کچھ بھی نہیں
مانگا خدا سے رات دن تیرے سوا کچھ بھی نہیں
سوچا تجھے، دیکھا تجھے، چاہا تجھے، پوجا تجھے
میری خطا میری وفا، تیری خطا کچھ بھی نہیں
جس پر ہماری آنکھ نے موتی بچھائے رات بھر
بھیجا وہی کاغذ اسے، ہم نے لکھا کچھ بھی نہیں
اک شام کے ساۓ تلے بیٹھے رہے وہ دیر تک
آنکھوں سے کیں باتیں بہت، منہ سے کہا کچھ بھی نہیں
احساس کی خوشبو کہاں ، آواز کے جگنو کہاں
خاموش یادوں کے سوا گھر میں رہا کچھ بھی نہیں
دو چار دن کی بات ہے دل خاک میں سو جائے گا
جب آگ پر کاغذ رکھا باقی بچا کچھ بھی نہیں
بشیر بدر

[Zarnish Ali]

آنکھوں میں رہا دل میں اتر کر نہیں دیکھا 
کشتی کے مسافر نے سمندر نہیں دیکھا 
بے وقت اگر جاؤں گا سب چونک پڑیں گے 
اک عمر ہوئی دن میں کبھی گھر نہیں دیکھا 
جس دن سے چلا ہوں مری منزل پہ نظر ہے 
آنکھوں نے کبھی میل کا پتھر نہیں دیکھا 
یہ پھول مجھے کوئی وراثت میں ملے ہیں 
تم نے مرا کانٹوں بھرا بستر نہیں دیکھا 
یاروں کی محبت کا یقیں کر لیا میں نے 
پھولوں میں چھپایا ہوا خنجر نہیں دیکھا 
محبوب کا گھر ہو کہ بزرگوں کی زمینیں 
جو چھوڑ دیا پھر اسے مڑ کر نہیں دیکھا 
خط ایسا لکھا ہے کہ نگینے سے جڑے ہیں 
وہ ہاتھ کہ جس نے کوئی زیور نہیں دیکھا 
پتھر مجھے کہتا ہے مرا چاہنے والا 
میں موم ہوں اس نے مجھے چھو کر نہیں دیکھا
بشیر بدر
 

[Zarnish Ali]

بھیگی ہوئی آنکھوں کا یہ منظر نہ ملے گا 
گھر چھوڑ کے مت جاؤ کہیں گھر نہ ملے گا 
پھر یاد بہت آئے گی زلفوں کی گھنی شام 
جب دھوپ میں سایہ کوئی سر پر نہ ملے گا 
آنسو کو کبھی اوس کا قطرہ نہ سمجھنا 
ایسا تمہیں چاہت کا سمندر نہ ملے گا 
اس خواب کے ماحول میں بے خواب ہیں آنکھیں 
جب نیند بہت آئے گی بستر نہ ملے گا 
یہ سوچ لو اب آخری سایہ ہے محبت 
اس در سے اٹھوگے تو کوئی در نہ ملے گا
بشیر بدر