قائم تو شہر شہر ہیں دارالشّفاء____مگر
 غم کا طبیب کوئی نہیں، کوئی بھی نہیں

اکیلے ہیں وہ اور جھنجلا رہے ہیں
 مِری یاد سے جنگ فرما رہےہیں

یہ کیسی ہوائے ترقی چلی ہے
 دِیے تو دِیے دِل بُجھے جا رہے ہیں

بہت خوش ہیں گستاخیوں پر ہماری
 بظاہر جو برہم نظر آ رہے ہیں

بہشتِ تصور کے جلوے ہیں میں ہوں
 جدائی سلامت مزے آ رہے ہیں

قیامت کے آنے میں رندوں کو شک تھا
 جو دیکھا تو واعظ چلے آ رہے ہیں

بہاروں میں بھی مے سے پرہیز توبہ
 خمار آپ کافر ہوئے جا رہے ہیں

خمار بارہ بنکوی