خِرد، جُنوں اور خواب، حقیقت، عِلم، عَمل، اِلہام

محنت، رغبت، چاہت، فُرصت، پِیا تمہارے نام

پِیا تمہارے نام کیا ہے عِشق، سفر، انجام

عِشق ہماری ذات مُناسب، پِیا تمہارے نام

پُورب، پچھّم، صُبح، دُپہری، فردا، دوش، مُقام

گھنگھرو، پایَل، ٹِیکہ، گھونگٹ، پِیا تمہارے نام

کاجل، مانگ، حِنا، انگوٹھی، سُرمہ، نینن، گیسُو

طبلہ، تال، بَنسُریا، ڈھولک، پِیا تمہارے نام

رات تمہارے نام ہماری، تَیل دِیا اور باتی

دِید، نظر، گفتار، عِبادت، پِیا تمہارے نام

راگ، سُہاگ، گلاب، دَوپٹّہ، چُوڑی، کنگن، جُوڑا

سانس، لب و رخسار کی حِدّت، پِیا تمہارے نام

رہبر، محرم، محور، مرکز، عِشق، پریت، محبّت

من بیتی میں یہ تشبِیہت، پِیا تمہارے نام

من کا وَرقہ وَرقہ کھولوں، نام تمہارا دیکھوں

مَن کی ایسی عِشق کِتابت، پِیا تمہارے نام

ہجرت، قید، قفس اور سولی، دار رسن اور مقتل

جھیلوں تہمت، طنز، ملامت، پِیا تمہارے نام