poetry Hum apni zaat k kafir hain

[waqas dar⚙]

ہم اپنی ذات کے کافر ہیں
ہم اپنی کم نگاہی کا
عجب اظہار کرتے ہیں
کہ جو آنکھوں سے اوجھل ہو
اسے تسلیم کرنے سے سدا انکار کرتے ہیں
جو سنتے ہیں
کہ تخلیق زماں سے بھی بہت پہلے
کہیں ہم لوگ رہتے تھے
فنایے وقت سے آگے
ہمیں موجود ہونا ہے
تو ہم اپنے تحیّر کو جھٹک کر
اس لئے انکار کر دیں گے
کہ ہم نے اپنے چہرے کو
گزشتہ چند برسوں ہی سے دیکھا ہے
یہ صورت کچھ ہی مدّت بعد آئینے میں نہ دیکھیں گے
یہ معیار نظر بنیاد منطق ہو
تو پھر اس کے تناظر میں
ہم اپنی ذات کے کافر
تمھاری کیا گواہی دیں