poetry Apne Honto Per Sajana Chahta Hun

[waqas dar⚙]

اپنے ہونٹوں پر سجانا چاہتا ہوں
آ تجھے میں گنگنانا چاہتا ہوں

کوئی آنسو تیرے دامن پر گرا کر
بُوند کو موتی بنانا چاہتا ہوں

بڑھ گئی اس حد تلک بے اعتمادی
تجھ کو تجھ سے بھی چھپانا چاہتا ہوں

تھک گیا میں کرتے کرتے یاد تجھ کو
اب تجھے میں یاد آنا چاہتا ہوں

اس لیے کی ہے تڑپنے کی تمنا
رقص کرنے کا بہانا چاہتا ہوں

آخری ہچکی ترے زانو پہ آئے
موت بھی میں شاعرانہ چاہتا ہوں

جو بنا باعث مری ناکامیوں کا
میں اُسی کے کام آنا چاہتا ہوں

چھا رہا ہے ساری بستی پراندھیرا
روشنی کو، گھر جلانا چاہتا ہوں

پھول سے پیکر تو نکلے بے مروّت
پتھروں کو آزمانا چاہتا ہوں

رہ گئی تھی کچھ کمی رسوائیوں میں
پھر قتیل اُس در پہ جانا چاہتا ہوں

قتیل شفائی