poetry سنا ھے حد نظر سے آگے

[Sahrish Dar 523]

سنا ھے حد نظر سے آگے
زندگی اب بھی مسکراتی ھے

اب بھی سورج کی وھی عادت ھے
گھر کے آنگن کو وہ جگاتا ھے
مرمریں شوخ سی حسین کرنیں
چہروں کو چوم کر اٹھاتی ہیں

وہاں کی صبحیں بڑی توانا ہیں
وہاں کے دن بھی بہت دانا ہیں
منہ اندھیرے سفر کو جاتے ہیں
روز پھر گھر میں شام ہوتی ھے

وہی برگد تلے کی ہیں شامیں
ایک حقہ ھے کئی ہیں سامع
اب بھی سب فکریں گلی محلے کی
باتوں باتوں میں ختم ہوتی ہیں

بچوں کا ھے وھی بچپن
جگنو, تتلی کی هے وھی ان بن
جھریوں سی اب بھی نانی وہاں
کہانی پریوں کى ھی سناتی ھے

اب بھی موسم وھی نشیلے ہیں
وھی قوس قزح کے جھولے ہیں
بارش کی مستیاں اب بھی
ٹین کی چھت پے گنگناتی ہیں

لفظوں میں لازوال زور سخن
رنگوں میں باکمال بانکا پن
جذبوں میں حدتیں باقی
محبتیں اب بھی بہت رلاتی ہیں

اب بھی دوستی کا مان ھے باقی
اب بھی رشتوں میں جان ھے باقی
اب بھی جنت ھے ماں کے قدموں میں
اب بھی ماں لوریاں سناتی ھے

مٹی میں خوشبویں اب بھی
پانیوں میں عکس ھیں باقی
زمین پہ تاروں کے سنگ آ کر
چاندنی محفلیں سجاتی هے

اب بھی راتوں کو چاند کی سکھیاں
اپنے چندا سے ملنے جاتی ہیں
اور اک دور کھڑے سائے کو
اپنی دھڑکنیں سناتی ہیں

اب بھی سب قافلے جشن میں ہیں
اب بھی سب فاصلے امن میں ہیں
مسافر اب بھی لوٹ آتے ہیں
ان کی یادیں نہیں ستاتی ہیں

چلو ہم بھی وہیں چلتے ہیں
جہاں اب بھی دل دھڑکتے ہیں
جہاں اب بھی وقت ساکن ھے
زندگی اب بھی مسکراتی ھے

سنا ھے حد نظر سے آگے
زندگی اب بھی مسکراتی ھے

[Waqas Dar 7,060]