اپنے گھروں میں چھوڑ آئے

[Waqas Dar 7,050]

متاعِ شام سفر بستیوں میں چھوڑ آئے 
بجھے چراغ تو ہم اپنے گھروں میں چھوڑ آئے 

بچھڑ کے تجھ سے چلے ہم تو اب کے یوں بھی ہوا 
کہ تیری یاد کہیں راستوں میں چھوڑ آئے 

ہم اپنی دربدری کے مشاہدے اکثر 
نصیحتوں کی طرح کمسنوں میں چھوڑ آئے 

خراج سیل بھلا اس سے بڑھ کر کیا ہو کہ لوگ 
کھلے مکان بھری بارشوں میں چھوڑ آئے 

گھرے ہیں لشکر اعدا میں اور سوچتے ہیں 
ہم اپنے تیر تو اپنی صفوں میں چھوڑ آئے 

کسے خبر ہے کہ زخمی غزال کس کے لئے 
نشان لہو کے گھنے جنگلوں میں چھوڑ آئے 

ہمارے بعد بھی رونق رہے گی مقتل میں 
ہم اہلِ دل کو بڑے حوصلوں میں چھوڑ آئے 

اّیں گے کیا وہ پرندے جو اپنے رزق سمیت 
سفر کا شوق بھی ٹوٹے پروں میں چھوڑ آئے 

سدا سُکھی رہیں چہرے وہ ہم جنہیں محسن 
بجھے گھروں کی کھلی کھڑکیوں میں چھوڑ آئے 

سید محسن نقوی