تُو سمجھتا ہے محبت سے گزر جائے گا؟

[Urooj Butt 861]

تُو سمجھتا ہے محبت سے گزر جائے گا ؟
تُو جو نکلے گا کناروں سے تو مر جائے گا 

یہ ضروری تو نہیں ہجر کے لمحات گنوں
"وقت کا کیا ہے، گزرتا ہے، گزر جائے گا"

یہ ترے بس کا نہیں روگ، میاں چھوڑ اسے
تُو بدن چاٹ کے الفت سے مکر جائے گا

میرے رونے سے سمندر میں اضافہ نہ سہی
کم سے کم آنکھ کا دریا تو اتر جائے گا

اے مرے عکسِ جنوں دیکھ مرے چہرے کو
تُو بھی خاموش رہے گا تو بکھر جائے گا

قیس کو قیس نما اور مجھے قیس کہا
میں نہ کہتا تھا مجھے دیکھ کے ڈر جائے گا 

 

[Waqas Dar 7,036]

ساری دنیا میں مرے جی کو لگا ایک ہی شخص
ایک ہی شخص تھا ایسا بخدا ایک ہی شخص

ایسا لگتا ہے سبھی عشق کسی ایک سے تھے
ایسا لگتا ہے مجھے ملتا رہا ایک ہی شخص

وہ جو میں نے اُس کی محبت بھی کسی اور سے کی
اُن دنوں شہر کا ہر شخص لگا ایک ہی شخص

میں تو اے عشق تیری کوزہ گری جانتا ہوں
تو نے ہم دو کو ملایا تو بنا ایک ہی شخص

مجھ سے ناراض نہ ہونا مرے اچھے لوگو !
کیا کروں میری محبت نے چُنا ایک ہی شخص

تو جو کہتا ہے ترے جیسے کئی اور بھی ہیں
تجھ کو دعویٰ ہے تو پھر خود سا دِکھا ایک ہی شخص

تو جسے چاہتا ہے میں بھی اُسے چاہتا ہوں
اچھا لگتا ہے مجھے تیرے سوا ایک ہی شخص

دوست ! سب سے کہاں کھنچتا ہے غزل کا چلّہ
حجرہء میر میں ہوتا ہے سدا ایک ہی شخص!