میڈا عشق وی توں, میڈا یار وی توں
 میڈا دین وی توں, میڈا ایمان وی توں

میڈا جسم وی توں، میڈا روح وی توں
 میڈا قلب وی توں،جند جان وی توں

میڈا کعبہ، قبلہ ،مسجد، ممبر
 مُصحف تے قرآن وی توں

میڈے فرض، فریضے، حج، زکوٰتاں
 صوم صلٰواۃ، اذان وی توں

میڈی زہد ، عبادت، طاعت،تقوٰی
 علم وی تُوں،عرفان وی توں

میڈا ذکر وی توں ،میڈا فکر وی توں
 میڈا ذوق وی توں، وجدان وی توں

میڈا سانول ،مٹھڑا، شام ،سلوُنا
من موہن ،جانان وی توں
میڈا مرشد،ہادی، پیر طریقت
 شیخِ حقائق دان وی توں

میڈی آس امید ،تے کھٹیا، وٹیا
تکیہ ،مان، تران وی توں
میڈا دھرم وی توں، میڈا بھرم وی توں
میڈی شرم وی توں، مینڈی شان وی توں
 میڈا ڈُکھ ،سُکھ، روون، کِھلن وی توں

میڈا درد وی توں ،درمان وی توں
 میڈےخوشیاں دا اسباب وی توں

میڈے سُولاں دا سامان وی توں
 میڈا حُسن تے بھاگ ،سُہاگ وی توں

میڈا بخت تے نام نِشان وی توں
میڈا دیکھن، بھالن، جاچن ،جوچن
سمجھن ،جان ،سنجان وی توں
میڈے ٹھڈرےساہ تے مونجھ مو نجھاری
 ہنجھوں دے طوفان وی توں

میڈے تلک ،تلولے ،سیندھاں ،مانگاں
ناز، نہوڑے تان وی توں
میڈی مہندی ،کجل ،مُساگ وی توں
 میڈی سُرخی ،بیڑا، پان وی توں

میڈی وحشت، جوش جنون وی توں
 میڈا گِریہ، آہ ، فغان وی توں

میڈا اول ،آخر ،اندر ،باہر
ظاہر تے پنہان وی توں
میڈا بادل ،برکھا ، کِھمنا ں، گاجاں
 بارش تے باران وی توں

میڈا ملک، ملیر تے مارو ،تھلڑا
روہی، چولستان وی توں
جے یار فرید قبول کرے
سرکار وی توں ،سلطان وی توں
نہ تاں کہتر ،کمتر،ا حقر ،ادنیٰ
 لاشئے، لا امکان وی توں