میں کسے سنا رہا ہوں یہ غزل محبتوں کی

کہیں آگ سازشوں کی ، کہیں آنچ نفرتوں کی

-

کوئی باغ جل رہا ہے ، یہ مگر مری دعا ہے

مرے پھول تک نہ پہنچے یہ ہوا تمازتوں کی

-

مرا کون سا ہے موسم مرے موسموں کے والی!

یہ بہار بے دلی کی ، یہ خزاں مروتوں کی

-

میں قدم بام و در میں انہیں جا کے ڈھونڈتا ہوں

وہ دیار نکہتوں کے ، وہ فضائیں چاہتوں کی

-

کہیں چاند یا ستارے ہوئے ہم کلام مجھ سے

کہیں پھول سیڑھیوں کے ، کہیں جھاڑیاں پتوں کی

-

مرے کاغذوں میں شاید کہیں اب بھی سو رہی ہو

کوئی صبح گلستاں کی ، کوئی شام پربتوں کی

-

کہیں دشت دل میں شاید مری راہ تک رہی ہو

وہ قطار جگنوں کی ، وہ مہک ہری راتوں کی

-

یہ نہیں کہ دب گئی ہے کہیں گرد روز و شب میں

وہ خلش محبتوں کی ، وہ کسک رفاقتوں کی