Zindagi ab bhi muskurati hai

[Waqas Dar 7,050]

 

سنا ہے حد نظر سے آگے
زندگی اب بھی مسکراتی ہے
اب بھی سورج کی وہی عادت ہے
گھر کے آنگن کو وہ جگاتا ہے
مرمریں شوخ سی حسین کرنیں 
چہروں کو چوم کر اٹھاتی ہیں
وہاں صبحیں بڑی توانا ہیں
اور سب دن بھی خوب دانا ہیں
منہ اندھیرے سفر کو جاتے ہیں
روز پھر گھر میں شام ہوتی ہے
وہی برگد تلے کی ہیں شامیں
ایک حقہ ھے کئی ہیں سامع
اب بھی فکریں گلی محلے کی 
باتوں باتوں میں ختم ہوتی ہیں
وہی بچوں کا ہے حسیں بچپن 
جگنو, تتلی کی ہے وہی ان بن
وہی جھریوں سی پیاری نانی ہے
وہی پریوں کى اک کہانی ہے
اب بھی موسم وہاں نشیلے ہیں 
وہی قوس قزح کے جھولے ہیں
وہی بارش کی مستیاں اب بھی
ٹین کی چھت پہ گنگناتی ہیں
ہے سخن باکمال لوگوں کا 
میٹھا پن لازوال لہجوں کا
سچ بھی جذبوں کی روح میں ہے شامل 
نہ محبت یہ آزماتی ہے
اب بھی باقی ہے دوستی کا مان 
اب بھی رشتوں میں جان باقی ہے
اب بھی جنت ہے ماں کے قدموں میں
اب بھی ماں لوریاں سناتی ہے
خوشبویں مٹیوں میں زندہ ہیں 
عکس بھی پانیوں میں ہیں باقی 
اب بھی تاروں کے سنگ راتوں کو
چاندنی محفلیں سجاتی ہے
اب بھی راتوں کو چاند کی سکھیاں 
اپنے چندا سے ملنے جاتی ہیں 
اور اک دور کھڑے سائے کو 
اپنی سب دھڑکنیں سناتی ہیں
اب بھی سب قافلے جشن میں ہیں 
اب بھی سب فاصلے امن میں ہیں 
مسافر جا کے لوٹ آتے ہیں
ان کی یادیں نہیں ستاتی ہیں
چلو اب ہم بھی وہیں چلتے ہیں 
جہاں دل آج بھی دھڑکتے ہیں 
جہاں اب بھی وہ وقت ساکن ہے
زندگی اب بھی مسکراتی ہے
سنا ہے حد نظر سے آگے
زندگی اب بھی مسکراتی ہے

 

[Waqas Dar 7,050]

ہائے میں کیسے بتاوں __کون دل کو لے گیا
شکل دیکهی ہے مگر واقف نہیں ہوں نام سے